मोठी बातमी : नागवडे साखर कारखान्याच्या अडचणी वाढल्या, प्रदुषण नियंत्रण मंडळाच्या पत्राने उडाली खळबळ !

जामखेड टाइम्स वृत्तसेवा :  श्रीगोंदा तालुक्यातील प्रतिष्ठित सहकार महर्षी शिवाजीराव नागवडे सहकारी साखर कारखान्याकडून पर्यावरण कायद्याचे तसेच नियमांचे वारंवार उल्लंघन होत असल्यामुळे कारखाना चालू ठेवणे पर्यावरणाच्या दृष्टीने योग्य नाही या निष्कर्षापर्यंत महाराष्ट्र प्रदुषण नियंत्रण मंडळ पोहोचले असून नागवडे सहकारी साखर कारखान्यास सन २०२२-२३ या वर्षांसाठी ऊस गाळपासाठी परवानगी देण्यात येऊ नये, असे पत्र महाराष्ट्र प्रदुषण नियंत्रण मंडळाने साखर आयुक्तांना दिले आहे. त्यामुळे नागवडे  कारखान्याच्या अडचणी वाढल्या आहेत.

नागवडे साखर कारखाना  घोडनदी आणि आसपासच्या शेतीजमीनींच्या प्रदुषणास कारणीभूत ठरत असूनही प्रदुषण नियंत्रण मंडळाकडून कायदेशीर कारवाई करण्यास टाळाटाळ होत असल्याप्रकरणी काष्टी येथील सामाजिक कार्यकर्ते व नुकसानग्रस्त शेतकरी सचिन सुदामराव पाचपुते यांनी पुण्यातील ॲड. विकास शिंदे, ॲड. गणेश माने, ॲड. उत्तम ढवळे यांच्या मार्फत राष्ट्रीय हरित न्यायाधिकरणाकडे धाव घेतली होती. या प्रकरणी राष्ट्रीय हरीत न्यायालयाकडून त्रीसदस्यीय समिती गठीत करण्यात आली असून चौकशीचे आदेश देण्यात आलेले आहेत.

आता सदर साखर कारखान्याला ऊस गाळपाची परवानगी देऊ नये असे पत्र महाराष्ट्र प्रदुषण नियंत्रण मंडळाने साखर आयुक्तांना दिल्याने अहमदनगर जिल्ह्यासह महाराष्ट्रातील सहकार क्षेत्रात खळबळ उडाली आहे.

नागवडे साखर कारखाना मोठ्या प्रमाणात प्रदूषण करत असल्याच्या तक्रारी स्थानिक नागरिक, शेतकरी, सामाजिक कार्यकर्ते यांनी वारंवार  केल्या आहेत. काही दिवसांपूर्वी मळी मिश्रित पाणी शेतकऱ्यांच्या उभ्या पिकांमध्ये सोडल्यामुळे स्थानिक शेतकऱ्यांनी श्रीगोंदा तहसील कार्यालयासमोर आंदोलन करून नुकसान भरपाईची मागणी केली होती. कारखान्याकडून जाणीवपूर्वक याकडे दुर्लक्ष करण्यात येत होते. आता मात्र कारखान्याने वारंवार केलेल्या याच दुर्लक्षामुळे यावर्षीचे ऊसाचे गाळप करता येणार नाही असेच चित्र दिसत आहे.