दिघोळ येथील निकृष्ट पुलाच्या कामाची चौकशी करून दोषींवर कडक कारवाई करा – ॲड शमा हाजी शेख यांची मागणी

‘ज्या’ ठेकेदाराने संबंधित काम केले होते ‘त्या’ ठेकेदाराच्या अनेक कामांची हिच बोंब आहे. ‘त्या’ ठेकेदाराने अनेक ‘निकृष्ट’ दर्जाची कामे केली आहेत. आजवर सातत्याने अधिकाऱ्यांनी ‘त्या’ ठेकेदाराला पाठाशी घातल्यामुळे तसेच राजकीय वरदहस्तामुळे तो ठेकेदार कोणालाही जूमानत नसल्याचे दिसून येते.

ग्रामीण भागातील जनतेला मुलभूत सुविधा मिळावी यासाठी सरकारकडून कोट्यावधीचा निधी दिला जात, मात्र ठेकेदार व अधिकाऱ्यांच्या भ्रष्ट यूतीमुळे झालेल्या विकास कामांचा निकृष्ट दर्जा दोन तीन महिन्यातच उघडा पडतो. अश्याच स्वरूपाची घटना दिघोळ- माळेवाडी रस्त्यावरील नव्या पुलाच्या बाबतीत घडली आहे. निकृष्ट दर्जाच्या कामामुळे पुल पडला आहे. या कामाची उच्चस्तरीय चौकशी करावी, यात दोषी आढळणाऱ्या अधिकाऱ्यांना तातडीने निलंबित करावे व संबंधित ठेकेदाराला काळ्या यादीत टाकावे अशी मागणी ॲड शमाहाजी शेख यांनी जामखेड तहसीलदार यांना दिलेल्या निवेदनातून केली आहे.

जामखेड तालुक्यात निकृष्ट कामे झाल्याची बोंब ठोकून एका पक्षाने मध्यंतरी मोठे रान पेटवले होते.आता दिघोळमधील त्या पुलाच्या निकृष्ट कामावर, त्या पक्षाचे कार्यकर्ते का बोंबा ठोकत नाहीत ? असा सवाल आता नागरिकांमधून विचारला जात आहे. ‘आपला तो बाबू, दुसर्‍याचं ते कार्ट’ अशीच राजकीय कार्यकर्त्यांची भूमिका तर नाही ना ? हा सवाल मात्र आता उपस्थित होऊ लागला आहे. तसेच सत्ताधारी गटानेही या गंभीर विषयाकडे दुर्लक्ष केले आहे. यामुळे जनतेत नाराजी पसरली आहे.