आमदार राम शिंदेंनी मंजुर केलेल्या योजनेचे श्रेय राष्ट्रवादीने लाटू नये, जवळा भाजपचा राष्ट्रवादीवर जोरदार हल्लाबोल !

जामखेड टाइम्स वृत्तसेवा । सत्तार शेख। केंद्रात आणि राज्यात सत्तेवर असलेल्या भाजप सरकारने मंजूर केलेल्या योजनेेेचे श्रेय लाटण्याचा प्रयत्न राष्ट्रवादीने करू नये. आमदार राम शिंदे यांनी केलेल्या पाठपुराव्यामुळेच जवळा पाणी पुरवठा योजनेला मंजुरी मिळाली आहे. त्यामुळे विरोधकांनी चमकोगिरी करण्याचा प्रयत्न करू नये, असा इशारा जवळा भाजपने दिला आहे.

जामखेड तालुक्यातील जवळा गावासाठी शिंदे – फडणवीस सरकारकडून जलजीवन मिशन योजनेंतर्गत 20 कोटी रूपये खर्चाच्या पाणी पुरवठा योजनेस नुकतीच प्रशासकीय मान्यता दिली आहे. आमदार रोहित पवार यांनीच योजना मंजूर करून आणली असा दावा राष्ट्रवादीकडून केला जात आहे. या दाव्याची भाजपकडून पोलखोल करण्यास सुरुवात झाली आहे.

महाराष्ट्रात महाविकास सरकार सत्तेवर नाही, तर भाजप सरकार राज्यात सत्तेवर आहे. शिंदे – फडणवीस सरकारने जवळा पाणी योजना मंजुर केली आहे. पंतप्रधान नरेंद्र मोदी यांच्या संकल्पनेतून देशात हर घर नल ही योजना राबवली जात आहे. या योजनेच्या माध्यमांतून जवळा गावासाठी पाणी योजना मंजुर झाली आहे. केंद्र आणि राज्य सरकारच्या निधीतून ही योजना होणार आहे. यात राष्ट्रवादीचा संबंध काय ? असा सवाल करत जवळा भाजपने राष्ट्रवादीच्या दाव्याची हवाच काढून घेतली आहे.