Nivadnuk Aayukt Maharashtra 2025 : दिनेश वाघमारे यांची महाराष्ट्र राज्य निवडणूक आयुक्तपदी नियुक्ती, कोण आहेत दिनेश वाघमारे ? जाणून घ्या
Nivadnuk Aayukt Maharashtra 2025 : वैद्यकीय शिक्षण विभागात अप्पर मुख्य सचिव म्हणून कार्यरत असलेल्या, दिनेश वाघमारे (Dinesh Waghmare ias) यांची महाराष्ट्र राज्याच्या निवडणूक आयुक्तपदी नियुक्ती (Maharashtra State Election Commissioner 2025) करण्यात आली आहे. याबाबतची अधिसुचना सरकारकडून सोमवारी काढण्यात आली आहे. मुख्यमंत्री देवेंद्र फडणवीस यांनी दिनेश वाघमारे यांच्या नावाचा प्रस्ताव राज्यपालांकडे पाठवला होता.राज्यपालांच्या मान्यतेने दिनेश वाघमारे यांची राज्य निवडणूक आयुक्त म्हणून निवड करण्यात आली. (Dinesh Waghmare Latest News Today)

राज्य निवडणूक आयुक्त यूपीएस मदान हे सप्टेंबरमध्ये निवृत्त झाले होते. तेव्हापासून हे पद रिक्त आहे. नव्या आयुक्तांची निवड गेल्या काही महिन्यांपासून रखडली होती. आयुक्तपदासाठी माजी मुख्य सचिव नितीन करीर, मुंबई पोर्ट ट्रस्टचे( बीपीटी) माजी अध्यक्ष राजीव जलोटा, नियोजन विभागाचे अप्पर मुख्य सचिव राजगोपाल देवरा, वैद्यकीय शिक्षण विभागाचे अप्पर मुख्य सचिव दिनेश वाघमारे यांच्यासह डझनभर सनदी अधिकारी इच्छुक होते. त्यात दिनेश वाघमारे यांनी बाजी मारली.
स्थानिक स्वराज्य संस्थांच्या निवडणुका गेल्या तीन वर्षांपासून रखडलेल्या आहेत. मुंबई, पुण्यासह राज्यातील महानगरपालिकांवर, जिल्हा परिषदांवर प्रशासकराज आहे. या निवडणुकी येत्या दोन ते तीन महिन्यात होऊ शकतात. त्यामुळे या निवडणुका पार पाडण्याचे मोठे आव्हान निवडणूक आयुक्त दिनेश वाघमारे यांच्यासमोर असणार आहेत.
कोण आहेत दिनेश वाघमारे ?
दिनेश वाघमारे हे 1994 च्या बॅचचे वरिष्ठ सनदी अधिकारी आहेत. त्यांनी महाराष्ट्र राज्य विद्युत पारेषण कंपनी मर्यादित (महापारेषण) चे अध्यक्ष आणि व्यवस्थापकीय संचालक म्हणून काम पाहिलेले आहे. ते सामाजिक न्याय विभागाचे प्रधान सचिव आहेत. वाघमारे यांना व्यवस्थापन व प्रशासन क्षेत्रातील २६ वर्षांपेक्षा अधिक अनुभव आहे. त्यांनी बी. ई. (इलेक्ट्रॉनिक्स) विश्वेश्वरय्या राष्ट्रीय तंत्रज्ञान संस्थेतून (व्हीएनआयटी) केले आहे. ते आयआयटी खरगपूरचे एम.टेक. (कॉम्प्युटर सायन्स) इंजिनिअर आहेत. इंग्लंडच्या ब्रॅडफोर्ड विद्यापीठातून त्यांनी विकास आणि प्रकल्प नियोजन या विषयातून एमएसस्सी केलेली आहे.