Ram Shinde : नुकसानग्रस्त शेतकऱ्यांच्या मदतीसाठी आमदार राम शिंदे मैदानात, ‘या’ ज्वलंत प्रश्नावर आमदार राम शिंदेंचे विखे-पाटलांना साकडे !

यावेळी बोलताना आमदार राम शिंदे म्हणाले की, जामखेड तालुक्यातील खर्डा परिसरात परतीच्या पावसामुळे आतोनात नुकसान झाले आहे ही बाब पालकमंत्री राधाकृष्ण विखे-पाटील यांना कळवली असता, ते तातडीने जामखेड तालुक्यातील शेतकऱ्यांचे आश्रू पुसण्यासाठी, त्यांच्या दु:खामध्ये सहभागी होण्यासाठी आणि त्यांच्या पाठीशी खंबीरपणे उभे राहण्यासाठी ऐन दिवाळीत शेतकऱ्यांच्या बांधावर आले त्यामुळे मी त्यांचे जामखेड तालुक्याच्या वतीने आभार व्यक्त करतो.

आमदार राम शिंदे पुढे म्हणाले की,परतीचा पाऊस अधिक काळ राहिल्यामुळे जामखेड तालुक्यात ज्वारी आणि हरभऱ्याच्या पेरण्या खोळंबल्या आहेत, ज्यांनी केल्या होत्या ती पिके पावसामुळे उगवली नाहीत. अतिवृष्टीमुळे शेतीचं मोठं नुकसान झाल आहे. अजून  एक दीड महिना शेतात पेरता येईल अशी परिस्थिती नाहीये, त्यामुळे नापेर क्षेत्र अधिक राहण्याची शक्यता मतदारसंघात निर्माण झाली आहे. त्याची देखील सरकारच्या माध्यमांतून पडताळणी करण्याची आवश्‍यकता आहे.

रब्बीचा हंगाम आमच्या शेतकऱ्यांच्या दृष्टीने महत्वाचा आहे. आपला परिसर रब्बीत येत असल्याने कधी कधी खरिपाचा विमा मिळायला देखील अडचण येते. आमचं मुख्य पीक रब्बी हे जर शासनाने समजलं असेल आणि त्याला जर पेरणीला अडचण येत असेल, पीक घ्यायला अडचण येत असेल, पेरलेलं वाया गेलेलं असेल तर याच्यावर देखील आपल्याला राज्य सरकार म्हणून आणि महसूल मंत्री म्हणून धोरणात्मक निर्णय घेऊन शेतकऱ्यांना दिलासा देण्याची आवश्यकता आहे असे साकडे आमदार राम शिंदे यांनी महसूलमंत्री राधाकृष्ण विखे-पाटील यांना घातले.