सावधान! पुढील २४ तास महत्त्वाचे; महाराष्ट्रात पावसाचा जोर वाढणार, जाणून घ्या ताजा हवामान अंदाज

जामखेड टाइम्स वृत्तसेवा । २१ जुलै २०२६ । काही दिवसांच्या विश्रांतीनंतर महाराष्ट्रात मान्सून पुन्हा सक्रिय झाला असून मुंबईसह कोकणातील अनेक भागांत पावसाचा जोर वाढण्याची शक्यता आहे. भारतीय हवामान विभागाने आज, २१ जुलै रोजी मुंबई, ठाणे आणि रायगड जिल्ह्यांसाठी ऑरेंज अलर्ट जारी केला असून तुरळक ठिकाणी मुसळधार ते अतिमुसळधार पाऊस पडण्याची शक्यता असून ताशी ५० ते ६० किलोमीटर वेगाने जोरदार वारे वाहण्याचाही अंदाज आहे.

भारतीय हवामान खात्याने (IMD) दिलेल्या ताज्या अंदाजानुसार, बंगालच्या उपसागरात तयार झालेल्या हवामान प्रणालीमुळे राज्यात उद्यापासून पावसाचा जोर पुन्हा वाढणार आहे. कोकण, मध्य महाराष्ट्र, मराठवाडा आणि विदर्भातील अनेक जिल्ह्यांत तुरळक ठिकाणी पावसाचा यलो अलर्ट जारी करण्यात आला असून नागरिक व शेतकऱ्यांना सतर्क राहण्याचे आवाहन करण्यात आले आहे.

मुंबई शहर आणि उपनगरांसह ठाणे जिल्ह्यात आज दिवसभर ढगाळ वातावरण राहण्याची शक्यता आहे. काही भागांत मध्यम स्वरूपाचा पाऊस पडेल; मात्र कमी कालावधीत मुसळधार ते अतिमुसळधार सरी कोसळण्याची शक्यता नाकारता येत नाही. रायगड जिल्ह्यातही तुरळक ठिकाणी मुसळधार ते अतिमुसळधार पावसाची शक्यता आहे. घाटमाथा, डोंगराळ आणि दरडप्रवण भागांत राहणाऱ्या नागरिकांनी विशेष सतर्कता बाळगणे आवश्यक आहे.

पालघर आणि रत्नागिरी जिल्ह्यांत यलो अलर्ट देण्यात आला आहे. या जिल्ह्यात तुरळक ठिकाणी मुसळधार पाऊस पडण्याची शक्यता असून ताशी ५० ते ६० किलोमीटर वेगाने वारे वाहू शकतात.

पुणे घाटमाथ्यावर ऑरेंज अलर्ट

पुणे शहरात हलक्या पावसाची शक्यता असली तरी पुणे जिल्ह्याच्या घाटमाथ्यावर परिस्थिती वेगळी राहणार आहे. लोणावळा, खंडाळा, मुळशी, ताम्हिणी, भोर आणि वेल्हा परिसरातील तुरळक ठिकाणी मुसळधार ते अतिमुसळधार पावसाची शक्यता असल्याने घाटमाथ्यासाठी ऑरेंज अलर्ट आहे.

नाशिकच्या घाटमाथ्यावर आणि सातारा जिल्ह्याच्या घाट परिसरातही तुरळक ठिकाणी मुसळधार पाऊस होऊ शकतो. पुणे, नाशिक आणि सातारा शहरांमध्ये मात्र हलका ते मध्यम स्वरूपाचा पाऊस अपेक्षित आहे.

मराठवाडा आणि उत्तर महाराष्ट्रात कसा राहणार पाऊस?

उत्तर महाराष्ट्रातील धुळे, नंदुरबार, जळगाव आणि नाशिकच्या मैदानी भागांत हलका ते मध्यम पाऊस किंवा पावसाच्या सरी पडण्याची शक्यता आहे. अहिल्यानगर जिल्ह्यात प्रामुख्याने हलक्या पावसाचा अंदाज व्यक्त करण्यात आला आहे.

मराठवाड्यात छत्रपती संभाजीनगर, जालना, परभणी, बीड, हिंगोली, नांदेड, लातूर आणि धाराशिव जिल्ह्यांत तुरळक ठिकाणी हलका ते मध्यम पाऊस किंवा पावसाच्या सरी पडू शकतात. मात्र कोकण आणि घाटमाथ्याच्या तुलनेत मराठवाड्यात पावसाचा जोर कमी राहण्याची शक्यता आहे.

विदर्भात पावसाचा जोर तुलनेने कमी

विदर्भातील अनेक जिल्ह्यांसाठी आज कोणताही मोठा जिल्हानिहाय पावसाचा इशारा देण्यात आलेला नाही. अकोला, अमरावती, बुलढाणा, भंडारा, चंद्रपूर, गडचिरोलीसह बहुतांश भागांत पावसाचा जोर तुलनेने कमी राहण्याचा अंदाज आहे.

तरीही वातावरणात अचानक बदल होऊन काही ठिकाणी विजांच्या कडकडाटासह पावसाच्या सरी पडू शकतात. त्यामुळे शेतकरी आणि नागरिकांनी अल्पकालीन ‘नाऊकास्ट’ सूचनांकडे लक्ष ठेवावे.

कोणते परिणाम होऊ शकतात?

कमी वेळेत होणाऱ्या मुसळधार पावसामुळे शहरी आणि सखल भागांत पाणी साचू शकते. रस्ते, रेल्वे, विमान आणि फेरीबोट वाहतुकीत तात्पुरते अडथळे निर्माण होण्याची शक्यता आहे. जोरदार वाऱ्यांमुळे कमकुवत झाडे किंवा फांद्या पडणे, जुन्या व जीर्ण इमारतींचे नुकसान होणे आणि वीजपुरवठा खंडित होण्याचा धोका आहे.

घाटमाथा आणि डोंगराळ परिसरात दरड कोसळणे, माती घसरणे आणि ओढे-नाल्यांच्या पाणीपातळीत अचानक वाढ होण्याची शक्यता आहे. नागरिकांनी पूल, नदीपात्र, धबधबे आणि वेगाने वाहणाऱ्या पाण्याजवळ जाणे टाळावे.

नागरिकांनी ही खबरदारी घ्यावी

घरातून बाहेर पडण्यापूर्वी आपल्या मार्गावरील वाहतूक आणि पाणी साचलेल्या भागांची माहिती घ्यावी. पाणी भरलेल्या रस्त्यातून वाहन नेण्याचा प्रयत्न करू नये. विजांच्या कडकडाटावेळी झाडाखाली, विजेच्या खांबाजवळ किंवा मोकळ्या जागेत उभे राहू नये.
मोबाइल, टॉर्च, आवश्यक औषधे आणि महत्त्वाची कागदपत्रे सुरक्षित ठिकाणी ठेवावीत. समुद्रकिनारे, धबधबे आणि डोंगराळ पर्यटनस्थळांवर जाण्याचे टाळावे.प्रशासन किंवा वाहतूक पोलिसांकडून दिल्या जाणाऱ्या अधिकृत सूचनांचे पालन करावे.

गेल्या काही दिवसांपासून राज्यात पावसाने विश्रांती घेतल्याने उकाड्यात वाढ झाली होती व मुंबई महानगर प्रदेशासह अनेक भागांत आर्द्रतेमुळे नागरिक हैराण झाले होते. मात्र आता मान्सून पुन्हा सक्रिय होत असून हवामान खात्याने पुढील दोन ते तीन दिवस राज्यभर पावसाचा अंदाज वर्तवला आहे.

आज (२० जुलै) सायंकाळी जारी झालेल्या राष्ट्रीय हवामान अंदाज केंद्राच्या बुलेटिननुसार, कोकण-गोवा तसेच मध्य महाराष्ट्रात २१ ते २२ जुलै दरम्यान तुरळक ठिकाणी अतिवृष्टीचा (अति मुसळधार पाऊस) इशारा देण्यात आला आहे. घाटमाथा परिसरात पावसाची तीव्रता अधिक राहण्याची शक्यता आहे.

मराठवाडा व विदर्भातील छत्रपती संभाजीनगर, जालना, परभणी, बीड, हिंगोली, नांदेड, लातूर, धाराशिव तसेच अकोला, अमरावती, बुलढाणा, नागपूर, चंद्रपूर, गडचिरोली आदी जिल्ह्यांमध्ये विजांच्या कडकडाटासह तुरळक ठिकाणी सरी कोसळण्याचा अंदाज आहे. मुंबई, ठाणे, रायगड, पालघर भागातही पावसाचे प्रमाण वाढण्याची शक्यता हवामान विभागाने वर्तवली आहे.

अहिल्यानगर आणि कर्जत-जामखेड हवामान अंदाज

अहिल्यानगर जिल्ह्यासाठीही हवामान खात्याने यलो अलर्ट जारी केला आहे. जिल्ह्यात उद्या, २१ जुलै रोजी विजांच्या कडकडाटासह तुरळक ते मध्यम स्वरूपाच्या पावसाची शक्यता आहे. कर्जत-जामखेड तालुक्यांतही ढगाळ वातावरणासह हलक्या ते मध्यम सरी कोसळू शकतात. २१-२२ जुलै दरम्यान मध्य महाराष्ट्रात काही ठिकाणी अतिवृष्टीचा इशारा असल्याने या भागातील शेतशिवारात पाणी साचण्याची तसेच ओढे-नाल्यांच्या पाणी पातळीत वाढ होण्याची शक्यता नाकारता येत नाही. नागरिक व शेतकऱ्यांनी हवामान खात्याच्या पुढील सूचनांकडे लक्ष ठेवावे.

ठळक मुद्दे:
– कोकण-गोवा व मध्य महाराष्ट्रात २१-२२ जुलैला अतिवृष्टीचा इशारा
– राज्यातील २० हून अधिक जिल्ह्यांना यलो अलर्ट जारी
– मराठवाडा-विदर्भात विजांच्या कडकडाटासह तुरळक सरींची शक्यता
– मुंबई, ठाणे, रायगड, पालघर घाट परिसरात पावसाचा जोर वाढणार
–  अहिल्यानगर जिल्ह्यात हलका ते मध्यम पावासाचा अंदाज