पिक विमा कंपनीस 72 तासाच्या आत नुकसानीची माहिती कळवा – तालुका कृषी अधिकारी राजेंद्र सुपेकर यांचे अवाहन
जामखेड टाइम्स वृत्तसेवा : सततच्या पावसामुळे किंवा स्थानिक हवामानामुळे जामखेड तालुक्यात शेतातील पिकांचे मोठे नुकसान झाले आहे. पिक विम्याची नुकसान भरपाई मिळावी यासाठी नुकसानग्रस्त शेतकऱ्यांनी आपल्या शेतात झालेल्या नुकसानीची माहिती पंतप्रधान पीक विमा योजनेंतर्गत असलेल्या संबंधित विमा कंपनीस 72 तासाच्या आत ऑनलाईन किंवा ऑफलाईन पध्दतीने कळवावी, असे अवाहन जामखेडचे तालुका कृषी अधिकारी राजेंद्र सुपेकर यांनी केले आहे.
सध्या जामखेड तालुक्यात परतीच्या पावसाने जोरदार तडाखा दिला आहे.यामुळे शेती पिकांचे मोठे नुकसान झाले आहे. जामखेड तालुक्यातील ज्या शेतकरी बांधवांनी पंतप्रधान पिक विमा योजनेत सहभाग घेतला आहे त्या सर्व शेतकऱ्यांनी आपल्या शेतात झालेल्या नुकसानी माहिती 72 तासाच्या आत विमा कंपनीस कळवणे आवश्यक आहे.
पिक विमा कंपनीस नुकसानीची माहिती न कळवल्यास पिक विमा मिळण्यास अडचणी येतील, त्यामुळे शेतकऱ्यांनी पिक विमा कंपनीस ऑनलाईन किंवा ऑफलाईन पध्दतीने माहिती कळवावी असे अवाहन जामखेडचे तालुका कृषी अधिकारी राजेंद्र सुपेकर यांनी केले आहे.
दरम्यान, जामखेड तालुक्यात पावसामुळे मोठे नुकसान झाले आहे. या नुकसानीचे महसूल आणि कृषी विभागाकडून संयुक्त पंचनामे आजपासून हाती घेण्यात आले आहे. जामखेड तालुक्यात नुकसानीचा आकडा मोठा आहे. जामखेड तालुक्यातील सर्व शेतकऱ्यांना पंतप्रधान पीक विमा योजनेचा लाभ मिळणे आवश्यक आहे.