खळबळजनक : ज्योती क्रांती मल्टिस्टेट बँकेवर भरदिवसा दरोडा, बंदुकीच्या धाकावर दरोडेखोरांनी लुटला दोन कोटींचा मुद्देमाल,नेमकं काय घडलं ? वाचा सविस्तर
जामखेड टाइम्स वृत्तसेवा : Jyoti Kranti Multistate Bank robbery in Dharashiv : ज्योती क्रांती मल्टिस्टेट बँकेच्या धाराशिव शाखेवर भरदिवसा दरोडा पडल्याची खळबळजनक घटना शनिवारी घडली आहे. या घटनेत दोन कोटींचा मुद्देमाल दरोडेखोरांनी लंपास केला आहे. धाराशिव शहराच्या मध्यवर्ती भागातील बँकेवर भरदिवसा पडलेल्या दरोड्याच्या या घटनेने धाराशिव (उस्मानाबाद) जिल्ह्यात मोठी खळबळ उडवून दिली.
धाराशिव शहरातील मुख्य भागातील ज्योती क्रांती मल्टीस्टेट बँकेवर (Jyoti Kranti Multistate Bank robbery in Dharashiv) पाचच्या सुमारास सशस्त्र दरोडा पडला. दरोडेखोरांनी बँकेच्या कर्मचाऱ्यांना बांधून ठेवत बँकेवर दरोडा घातला. सोन्यासह सुमारे दोन कोटी रुपयांचा मुद्देमाल दरोडखोरांनी लंपास केला आहे.या सर्व घटनेचा थरार सीसीटीव्हीमध्ये कैद झाला आहे. बंदूक आणि चाकूचा धाक दाखवून दरोडा घातला गेल्याने मोठी खळबळ उडाली आहे. घटनेची माहिती मिळाल्यानंतर पोलिस घटनास्थळी दाखल झाले. पोलिसांनी दरोडेखांचा तपास सुरु केला आहे. सीसीटीव्हीमध्ये 4 दरोडेखोर कैद झाले आहेत.
धाराशिव जिल्हा स्टेडियमच्या जवळ असलेल्या सुनील प्लाझामधील ज्योती क्रांती को-ऑपरेटिव्ह क्रेडिट सोसायटी लिमिटेड ही बँक दिवसाढवळ्या लुटण्यात आली. घटना घडताच बँक कर्मचाऱ्यांनी शहर पोलीस स्टेशनचे पोलीस निरीक्षक उस्मान शेख यांच्याशी संपर्क साधून सदर घडलेली घटना सांगितली. त्यानंतर पोलिस घटनास्थळी तातडीने दाखल झाले.
नेमकं काय घडलं ?
अज्ञात पाच जणांनी ज्योती क्रांती बँकेत प्रवेश केला. यावेळी बँकेत दोन कर्मचारी उपस्थित होते. पिस्टल आणि चाकूचा धाक दाखवून दरोडेखोरांनी कर्मचाऱ्यांना बांधून ठेवले आणि लाखो रुपये, सोने लुटले. दिवसाढवळ्या बंदूक आणि चाकूचा धाक दाखवून दरोडा घातला गेल्याने खळबळ उडाली आहे.
याबाबत पोलीस सूत्रांकडून मिळालेल्या माहितीनुसार चोरीला गेलेला मुद्देमाल नेमका किती आहे हे स्पष्ट झालेलं नाही पण ते दोन कोटी रुपयांच्या जवळपास असल्याचं सांगितलं जातंय. बँक कर्मचाऱ्यांच्या तोंडाला चिकटपट्टी लावत बँक लुटल्याचे कर्मचाऱ्यांनी सांगितले.
दरम्यान, बँकेवर दरोडा पडल्याची घटना समजताच घटनास्थळी अपर पोलीस अधीक्षक गोहर हसन, उपविभागीय पोलीस अधिकारी स्वप्निल राठोड, स्थानिक गुन्हे शाखेचे पोलीस निरीक्षक वासुदेव मोरे, आनंद नगर पोलीस स्टेशनचे पोलीस निरीक्षक प्रवीण कुमार बांगर दाखल झाले असुन तपास सुरू आहे.