जामखेड टाइम्स वृत्तसेवा : 7 जूलै 2023 : राज्यातील जिल्हा परिषद,पंचायत समित्या, महानगरपालिका, नगरपंचायती, नगरपालिका, नगरपरिषदा, यांच्या रखडलेल्या निवडणूका कधी होणार याकडे सर्वांचेच लक्ष लागलेले असतानाच निवडणूक आयोगाने मतदारयाद्या अद्ययावत करण्याची प्रक्रिया हाती घेतल्याने या निवडणूका सप्टेंबर – ऑक्टोबर महिन्यात होणार असल्याचे बोलले जात होते, परंतू आता निवडणूक आयोगाने याबाबत मोठा खुलासा केला आहे.
राज्य निवडणूक आयोगातर्फे ५ जुलै रोजी स्थानिक स्वराज्य संस्थांच्या निवडणुकांसंदर्भातील मतदार यादीबाबतची (कट ऑफ डेट) अधिसूचना प्रसिद्ध केली आहे. त्यात प्रत्यक्षात कोणत्याही निवडणूक कार्यक्रमाची घोषणा करण्यात आलेली नाही, असे स्पष्टीकरण राज्य निवडणूक आयुक्त यू.पी.एस.मदान यांनी केले आहे.
निवडणूक आयोगाने जारी केलेल्या प्रसिध्दी पत्रकात म्हटले आहे की, राज्य निवडणूक आयोगातर्फे ५ जुलै २०२३ रोजी स्थानिक स्वराज्य संस्थांच्या निवडणुकांसंदर्भातील मतदार यादीबाबतची ( कट ऑफ डेट) अधिसूचना प्रसिद्ध केली आहे. त्यात प्रत्यक्षात कोणत्याही निवडणूक कार्यक्रमाची घोषणा करण्यात आलेली नाही. शिवाय ग्रामपंचायत निवडणूक वगळता अन्य सर्व स्थानिक स्वराज्य संस्थांच्या निवडणुकांबाबत सर्वोच्च न्यायालयाने ‘जैसे थे चे आदेश दिले आहेत. त्यामुळे निवडणूक कार्यक्रमाची घोषणा करण्याचा प्रश्न उद्भवत नाही, असे स्पष्टीकरण राज्य निवडणूक आयुक्त यू. पी. एस. मदान यांनी आज येथे केले.
श्री. मदान यांनी सांगितले की, स्थानिक स्वराज्य संस्थांच्या निवडणुकांसाठी स्वतंत्र मतदार याद्या तयार करण्यात येत नाहीत. त्यासाठी विधानसभा मतदारसंघांच्या मतदार याद्या जशाच्या तशा घेवून केवळ प्रभागनिहाय विभाजित केल्या जातात. स्थानिक स्वराज्य संस्थांच्या आगामी संभाव्य सर्वच सार्वत्रिक आणि पोटनिवडणुकांसाठी विधानसभा मतदारसंघाच्या याद्या वापरण्याकरिता एक विशिष्ट तारीख (कट ऑफ डेट) निश्चित केली जाते. त्याच धर्तीवर स्थानिक स्वराज्य संस्थांच्या आगामी संभाव्य सार्वत्रिक आणि पोटनिवडणुकांसाठी १ जुलै २०२३ ही कट ऑफ डेट निश्चित करण्याबाबतची अधिसूचना ५ जुलै २०२३ रोजी प्रसिद्ध करण्यात आली आहे.
स्थानिक स्वराज्य संस्थांच्या निवडणुकांसाठी विधानसभा मतदारसंघाच्या अद्ययावत मतदार याद्या वापरण्यासाठीच वेळोवेळी कट ऑफ डेट निश्चित केली जाते आणि त्यासंदर्भातील अधिसूचनाही प्रसिद्ध केली जाते. यापूर्वीदेखील या स्वरूपाच्या अधिसूचना प्रसिद्ध करण्यात आल्या आहेत. या अधिसूचना म्हणजे प्रत्यक्ष निवडणूक कार्यक्रम नसतो. अधिसूचनेत नमूद केलेल्या कालावधीत सार्वत्रिक किंवा पोटनिवडणुका न झाल्यास, पुन्हा नव्याने कट ऑफ डेट निश्चित करण्यासाठी अधिसूचना प्रसिद्ध केली जाते, असेही श्री. मदान यांनी सांगितले.
दरम्यान, स्थानिक स्वराज्य संस्थांच्या निवडणुका लढवण्यासाठी इच्छूक असलेल्या उमेदवारांचा मात्र हिरमोड झाला आहे. निवडणूक लांब जात असल्याने इच्छूक उमेदवार पुन्हा बॅकफूटवर गेले आहे. निवडणूकांच्या तयारीसाठी भरमसाठ खर्च करणाऱ्या उमेदवारांना आणखीन काही दिवस निवडणुकांची वाट पहावी लागणार आहे.