भारतीय सैन्य, नौदल व वायुदल अधिकारी भरतीसाठी नाशिक येथे सीडीएस पूर्वतयारी प्रशिक्षण; १९ जानेवारीपासून सुरू होणार कोर्स

जामखेड टाइम्स वृत्तसेवा : भारतीय सैन्यदल, नौदल व वायुदलामध्ये अधिकारी पदावर भरती होण्यासाठी पात्र उमेदवारांसाठी कंबाइन्ड डिफेन्स सर्व्हिस (सीडीएस) परीक्षेच्या पूर्वतयारीसाठी महाराष्ट्र शासनातर्फे छात्रपूर्व प्रशिक्षण केंद्र, नाशिक रोड, नाशिक येथे विशेष प्रशिक्षण कोर्स आयोजित करण्यात आला आहे. हा सीडीएस कोर्स क्रमांक ६६ दिनांक १९ जानेवारी २०२६ ते ३ एप्रिल २०२६ या कालावधीत राबविण्यात येणार आहे.

महाराष्ट्रातील नवयुवक व नवयुवतींसाठी ही प्रशिक्षण संधी उपलब्ध असून, या कोर्ससाठी निवड करण्यात आलेल्या प्रशिक्षणार्थींनी दिनांक १८ जानेवारी २०२६ रोजी सकाळी १०.०० वाजता छात्रपूर्व प्रशिक्षण केंद्र, नाशिक रोड येथे प्रत्यक्ष हजर राहणे बंधनकारक असल्याची माहिती मुंबई शहर जिल्हा सैनिक कल्याण अधिकारी यांनी प्रसिद्धीपत्रकाद्वारे दिली आहे.

या प्रशिक्षणामध्ये सीडीएस परीक्षेच्या लेखी परीक्षेची तसेच शारीरिक, मानसिक व व्यक्तिमत्त्व विकासाची सखोल पूर्वतयारी करून घेतली जाते. भारतीय संरक्षण दलामध्ये अधिकारी म्हणून करिअर घडवू इच्छिणाऱ्या उमेदवारांसाठी हा कोर्स अत्यंत उपयुक्त ठरणार आहे.

या प्रशिक्षणाबाबत अधिक माहितीसाठी प्रभारी अधिकारी, छात्रपूर्व प्रशिक्षण केंद्र, नाशिक रोड, नाशिक यांच्याशी संपर्क साधावा. यासाठी ई-मेल आयडी – training.petenashik@gmail.com, दूरध्वनी क्रमांक – ०२५३-२४५१०३२ तसेच व्हॉट्सॲप क्रमांक – ९१५६०७३३०६ (प्रवेशपत्र मिळविण्यासाठी) उपलब्ध असून कार्यालयीन वेळेत प्रत्यक्ष अथवा दूरध्वनीवर संपर्क साधण्याचे आवाहन मुंबई शहर जिल्हा सैनिक कल्याण अधिकारी यांनी केले आहे.