ऐतिहासिक निर्णय: राज्यातील ११ जिल्ह्यांत सुरू होणार नवीन अप्पर जिल्हाधिकारी कार्यालये, सरकारची मंजुरी, कोणत्या जिल्ह्यांना लाभ मिळणार? वाचा संपूर्ण यादी

मुंबई, दि. १० मार्च २०२६ : सर्वसामान्य नागरिकांना महसूल विभागाच्या कामांसाठी आता जिल्हा मुख्यालयात लांबचा प्रवास करावा लागणार नाही. राज्य सरकारने राज्यातील ११ जिल्ह्यांमध्ये नवीन अप्पर जिल्हाधिकारी (ADM) कार्यालये स्थापन करण्याचा महत्त्वपूर्ण निर्णय घेतला असून, महसूल मंत्री चंद्रशेखर बावनकुळे यांनी आज विधानसभेत ही घोषणा केली.

कोणत्या जिल्ह्यांना मिळणार नवीन कार्यालये?

मंत्रिमंडळाने मंजुरी दिलेल्या यादीनुसार ठाणे, रत्नागिरी, पुणे (बारामती), सातारा, सोलापूर, जळगाव, नांदेड, अमरावती, यवतमाळ, बुलढाणा आणि नागपूर या ११ जिल्ह्यांमध्ये नवीन कार्यालये उघडण्यात येणार आहेत. याशिवाय जमाबंदी आयुक्त कार्यालयातही दोन अतिरिक्त ADM पदे देण्यात आली आहेत.

१४३ नवीन पदे निर्माण होणार

प्रत्येक नवीन कार्यालयात १३ अधिकारी व कर्मचारी असतील. एकूण १४३ पदांच्या निर्मितीला उच्चस्तरीय सचिव समितीने मान्यता दिली असून मंत्रिमंडळाने १० फेब्रुवारी २०२६ रोजी ‘एस-२५’ वेतनश्रेणीतील पदांना अंतिम मंजुरी दिली आहे.

साकोली, हिंगणघाटसाठी सकारात्मक संकेत

विधानसभेत नाना पटोले यांनी साकोली आणि हिंगणघाट येथेही कार्यालयाची मागणी केली. त्यावर मंत्री बावनकुळे म्हणाले की, २०२७ च्या जनगणनेनंतर जिल्हा पुनर्रचनेचा विचार होईल, मात्र सध्या या दोन्ही ठिकाणांसाठी लवकरच विशेष बैठक घेऊन निर्णय घेतला जाईल.

पुढचा टप्पा — ६९ अप्पर तहसील कार्यालये

केवळ ADM कार्यालयेच नव्हे, तर राज्यात ६९ नवीन अप्पर तहसीलदार कार्यालये आणि १० नवीन प्रांत कार्यालये निर्माण करण्याचा प्रस्तावही अंतिम टप्प्यात असल्याचे मंत्र्यांनी सांगितले. शहरी भागातील प्रत्येक विधानसभा मतदारसंघात स्वतंत्र तहसील कार्यालय असावे, असाही प्रस्ताव विचाराधीन असल्याचे त्यांनी स्पष्ट केले.