IPS Anjana Krishna Viral Video Case : आयपीएस अंजना कृष्णा व्हायरल व्हिडीओ प्रकरणावर उपमुख्यमंत्री अजित पवारांनी केली भूमिका स्पष्ट, अजितदादा काय म्हणाले ? वाचा सविस्तर
IPS Anjana Krishna viral video case : सोलापूर (Solapur) जिल्ह्यातील कुर्डू (kurdu) येथील अवैध मुरूम उत्खनन रोखण्यासाठी कारवाई करत असलेल्या आयपीएस अंजना कृष्णा (ips anjana krishna) यांच्याबाबत व्हायरल झालेल्या व्हिडीओमुळे राज्याचे उपमुख्यमंत्री अजितदादा पवार (Ajit Pawar) यांच्याविरोधात सोशल मीडिया सह राजकीय वर्तुळातून टीकेची झोड उठू लागताच अजित पवार यांनी या प्रकरणावर आपली भूमिका स्पष्ट केली आहे.
कुर्डू व्हायरल व्हिडीओ प्रकरणावर अजित पवार नेमकं काय म्हणाले ?
सोलापूर जिल्ह्यातील पोलीस अधिकाऱ्यांसोबतच्या संवादाच्या संदर्भात काही व्हिडिओ समाजमाध्यमांवर प्रसारित होत आहेत. मी स्पष्टपणे सांगू इच्छितो की, माझा उद्देश कायद्याच्या अंमलबजावणीमध्ये हस्तक्षेप करण्याचा नव्हता, तर त्या ठिकाणी परिस्थिती शांत रहावी आणि ती अधिक बिघडू नये याची काळजी घेण्याचा होता, असे अजित पवार म्हणाले.
पवार पुढे म्हणाले, आपल्या पोलीस दलाबद्दल तसंच धैर्यानं आणि प्रामाणिकपणे आपलं कर्तव्य बजावणाऱ्या महिला अधिकाऱ्यांबद्दल मला सर्वोच्च आदर आहे. माझ्यासाठी कायद्याचं राज्य हेच सर्वात महत्त्वाचं आहे.
मी पारदर्शक प्रशासकीय कारभारासाठी आणि बेकायदेशीर वाळू, माती, खडक उपशासह प्रत्येक बेकायदेशीर कृतीवर कायद्याप्रमाणे कठोर कारवाई करण्यासाठी कटिबद्ध आहे, अशी भूमिका अजित पवार यांनी सोशल मीडियावर केलेल्या पोस्टमध्ये जाहिर केली आहे.